सस्तो भयो पेट्रोल र डिजेल

काठमाडौँ । नेपाल आयल निगम ले पेट्रोल र डिजेलको मूल्य घटाएको छ। निगमले बिहीबार सूचना जारी गर्दै शुक्रबार बिहान १२ बजेदेखि लागू हुने गरी पेट्रोलमा प्रतिलिटर २ रुपैयाँ र डिजेल–मट्टितेलमा १२ रुपैयाँले मूल्य घटाएको जनाएको हो।
नयाँ दरअनुसार पहिलो वर्गका क्षेत्रमा अब पेट्रोलको खुद्रा मूल्य प्रतिलिटर २१४ रुपैयाँ ५० पैसा र डिजेल–मट्टितेलको २२२ रुपैयाँ ५० पैसा कायम गरिएको छ।
यता, हवाई इन्धन र खाना पकाउने एलपी ग्यासको मूल्य भने बढाइएको छ। आन्तरिक हवाई इन्धनमा प्रतिलिटर ७ रुपैयाँ वृद्धि गरिएको छ भने अन्तर्राष्ट्रिय उडानका लागि काठमाडौँबाट प्रति किलो लिटर ४६ अमेरिकी डलरले बढाइएको छ। त्यस्तै, एलपी ग्यासमा प्रति सिलिन्डर १५० रुपैयाँ वृद्धि भई अब नयाँ मूल्य २१६० रुपैयाँ पुगेको छ।