सर्वोच्च अदालतको आदेशपछि रेशम चौधरी पक्राउ, पार्टी एकीकरण कार्यक्रम स्थगित

काठमाडौं, १७ वैशाख – नागरिक उन्मुक्ति पार्टी (नाउपा)का संरक्षक रेशम चौधरी सर्वोच्च अदालतको आदेशपछि सोमबार पक्राउ परेका छन्।

टीकापुर घटनामा जन्मकैद सजाय पाएका चौधरीलाई २०८० जेठ १५ गते राष्ट्रपतिबाट आममाफी दिइएपछि जेलमुक्त गरिएको थियो। तर सर्वोच्च अदालतले हालै उक्त आममाफीको फैसला उल्ट्याएपछि उनलाई पुनः पक्राउ गरिएको हो।

काठमाडौं प्रहरी परिसरका प्रवक्ता एसपी अपिलराज बोहराले भने, “सर्वोच्च अदालतले आममाफीको निर्णय बदर गरेपछि हामीले उनलाई पक्राउ गरी डिल्लीबजार कारागारमा बुझाएका छौं।”

पक्राउ परेका चौधरीलाई अहिले डिल्लीबजार कारागारमा राखिएको छ। उनलाई जनमत पार्टी र नाउपाबीच पार्टी एकीकरण घोषणा कार्यक्रमको तयारी भइरहेका बेला पक्राउ गरिएको हो। चौधरीकै उपस्थितिमा कार्यक्रमको तयारी भइरहेकाले गिरफ्तारीपछि कार्यक्रम स्थगित गरिएको छ।

उता, नागरिक उन्मुक्ति पार्टीकी नेतृ रञ्जिता श्रेष्ठ यस विषयमा अहिले सम्म सार्वजनिक रूपमा केही बोलेकी छैनन्। श्रेष्ठ काठमाडौंमै भए पनि कार्यक्रमस्थलमा भने नदेखिएको स्रोतहरूले जनाएका छन्।

सर्वोच्चको आदेशले चौधरीको राजनीतिक भविष्यसँगै नेपालका संवैधानिक निकायहरूका बीचको सम्बन्धमा नयाँ बहस पनि सुरु हुने देखिएको छ।