पुनर्वास ३ राम बस्तीमा सांस्कृतिक कार्यक्रम आयोजना हुँदै

कञ्चनपुर/ २७ पुस। पुनर्वास नगरपालिका वडा नम्बर ३ स्थित रामबस्ती, कुंकरमा बोम्बो नाच, मेन्दो माया नाचसहित विविध सांस्कृतिक कार्यक्रम आयोजना हुने भएको छ।
आयोजकका अनुसार कार्यक्रम २०८२ साल पुष ३० गते साँझ ६ बजेदेखि माघ १ गते दिउँसो ४ बजेसम्म सञ्चालन हुनेछ। कार्यक्रममा तामाङ समुदायको मौलिक कला, संस्कृति र परम्परालाई झल्काउने बोम्बो नाच, मेन्दो माया नाचलगायत अन्य सांस्कृतिक प्रस्तुतिहरू समावेश गरिनेछ।
स्थानीय कला–संस्कृतिको संरक्षण र प्रवर्द्धन गर्ने उद्देश्यले आयोजना गरिएको उक्त कार्यक्रममा स्थानीय कलाकारहरूको सक्रिय सहभागिता रहने आयोजकले जनाएको छ। आयोजकले सम्पूर्ण स्थानीयवासी तथा संस्कृतिप्रेमीहरूलाई कार्यक्रममा उपस्थित भई कार्यक्रमलाई सफल बनाउन हार्दिक आमन्त्रणसमेत गरेको छ।