सुनको मूल्यमा नयाँ रेकर्ड, हालसम्मकै उच्च विन्दुमा

काठमाडौ/ ११ पुस ।
नेपाली बजारमा शुक्रबार सुनको मूल्यले नयाँ कीर्तिमान कायम गरेको छ। पछिल्ला दिनदेखि निरन्तर बढ्दै आएको सुनको मूल्य आज हालसम्मकै उच्च विन्दुमा पुगेको हो। आज सुन प्रतितोला २ लाख ६९ हजार ३०० रुपैयाँमा कारोबार भएको छ, जुन अघिल्लो रेकर्डभन्दा प्रतितोला १ हजार २०० रुपैयाँ बढी हो।
यसअघि बुधबार सुन प्रतितोला २ लाख ६८ हजार १०० रुपैयाँमा कारोबार भएको थियो भने बिहीबार घटेर २ लाख ६७ हजार ५०० रुपैयाँमा झरेको थियो।
सुनसँगै चाँदीको मूल्यमा पनि वृद्धि देखिएको छ। बिहीबार प्रतितोला ४ हजार ४ सय रुपैयाँमा कारोबार भएको चाँदी शुक्रबार ४ हजार ५ सय ६५ रुपैयाँ पुगेको छ, जसमा प्रतितोला १६५ रुपैयाँको वृद्धि भएको हो।
अन्तर्राष्ट्रिय बजारमा पनि सुनको मूल्य उकालो लागेको छ। आज सुन प्रतिऔंस ४,५१२ अमेरिकी डलरमा कारोबार भइरहेको छ।